Mario Tama é un fotoxornalista con base en Nova York. Graduado en fotoxornalismo en 1993, comenzou traballando para xornais da área de Washington, e en 2001 fichou pola prestixiosa Getty Images.Cubreu as guerras de Afganistán e Iraq, o terremoto de Haití, ou a devastación que causou en Nova Orleans o Furacán Katrina, así como a evolución desa zona os anos posteriores. A esta última serie corresponde esta imaxe, tomada o 6 de setembro de 2005, logo do paso do furacán.
Cando a californiana Isadora Kosofsky tiña 15 anos faleceu a súa avóa: “A dor que trouxo o seu falecemento levoume a documentar as vidas e as relacións entre os anciáns, sobre todo mulleres, en Los Angeles, ao longo de catro anos“. Agora, con só 18 anos, ven de recibir o prestixioso premio Inge Morath Award na súa edición do 2012 pola súa serie Os tres.
Logo de tres anos con esta temática, coñeceu a quenes serían protagonistas da parte máis coñecida da súa obra; o triángulo amoroso formado por Will (84 anos), Jeanie (82) e Adina (90). Na súa serie, Isadora recolle a vida cotiá destes anciáns que viven a súa relación abertamente na prórroga do seu percorrido vital.
Páxina: isadorakosofsky.com
En México, a pobreza extrema de gran parte da poboación contrasta cunha riqueza sen límites duns poucos. Coma parte da élite política e económica, a fotógrafa Daniela Rossell, filla dun alto cargo do PRI, criouse nun ambiente ao que a maioría dos seus compatriotas só teñen acceso a través das telenovelas.
Nese contexto, realizou unha serie de retratos das fillas desas familias adiñeiradas, fotografiadas nas súas vivendas. Logo plasmouse nun libro, “Ricas y famosas” (2002). Se ben as propias rapazas se prestaron ás fotografías, o novorriquismo, horror vacui e unha imitación confusa do que se supón o estilo de vida aristocrático, provocan un resultado tremendamente irónico. Máis imaxes en Behold, o fotoblog da revista Slate.
Hoxe non hai foto, senón vídeo. O motivo é que esta vez queremos fixarnos na obra do fotógrafo e director Anton Corbijn (20/05/1955, Strijen, Países Baixos). Se ben na súa vertente coma fotógrafo destaca polos seus retratos de cantantes e músicos famosos, Corbijn é autor de moitos dos videoclips máis coñecidos da música contemporánea, con traballos para U2, Metallica, RHCP, REM, Nirvana, Travis, Coldplay, Depeche Mode…
Se votades unha ollada ó listado das súas creacións, seguramente vos soprenda ver cantos dos videoclips máis coñecidos son obra deste autor holandés.
Enric Adrian Gener (Menorca, 1982) está especializado na fotografía submarina, á que chegou pola súa afección ao buceo. Peixes, baleas, surfeiros ou modelos, todo desde unha perspectiva subacuática: “A partir de 10 metros no tienes rojos, luego pierdes amarillos y a partir de 50 metros ya no tiene claros. Me gustan los dos extremos. Cuando bajo por debajo de los 50 metros me gustan las fotos angulares casi en blanco y negro”.
Web: 27mm.net
O alemán Klaus Nigge (1956), Licenciado en Bioloxía, empezou a adicarse á fotografía con 28 anos, e desde hai máis de vinte é membro da Sociedade de Fotógrafos de Natureza de Alemaña.
Está especializado en natureza salvaxe, coma esta bandada de flamengos, e traballa para medios do nivel de National Geographic ou a revista GEO. Podedes atopar máis imaxes del na súa páxina: www.nigge.com
Cómo sería vivir sen electricidade? Para calquera de nós, impensable. O fotógrafo Peter Dicampo (www.peterdicampo.com) adicou varios anos a percorrer países, desde Ghana ó Nepal, nos que esa carencia é o habitual. O resultado é a súa mostra Vida sen luces.
Berenice Abbott, nada en Springfield (Ohio) o 17/07/1898 e finada en Maine o 9/12/1991, foi unha fotógrafa estadounidense coñecida polas súas fotografías de Nova York nos anos 30.
Cando tiña 20 anos abandonou a universidade e o seu Estado natal, e mudouse ao barrio de Greenwich Village, en Nova York, onde viveu durante tres anos nun ambiente bohemio. Despois cruzou o Atlántico para asentarse en París ata o 1929, ano no que retornou a Nova York. A partir daí comenza a súa etapa máis recoñecida. Unha mostra é esta imaxe da ponte de Manhattan ao fondo, tomada en marzo de 1936.
Un dos espazos emblemáticos de Cambados é a Praza de Fefiñáns. O 17 de setembro de 2012, o Diario Oficial de Galicia publicou o decreto que lle outorgaba a consideración de Ben de Interese Cultural ó conxunto formado polo Pazo, xunto coa súa horta e o bosque, e a igrexa de San Bieito, máis non así a propia praza.
En Click Cambados queremos celebralo divulgando unha das fotografías máis antigas que se coñecen da praza, de autor descoñecido e con data do ano 1910. Descoñecemos a identidade do autor.
O fotógrafo e cineasta Stephen Alvarez (1965), colaborador de National Geographic desde o 1995, documenta historias por todo o mundo sobre exploración, cultura, relixión e as consecuencias dos conflictos.
Páxina: www.alvarezphotography.com
Click Cambados 